Rev 9 | AOJ | STEP | Eaꞌ ensel anamba nagafeꞌma wanif bifi nufapula biugel ananini, ati anona ondoꞌw nakwaha heven nowai itap. Ondoꞌw anamba anona ensel. Eaꞌ esis sasoꞌana ki utaini ma anona nowaga nagal nogowala itap awini. Nowaga anamba owaꞌ nefeꞌ nogotambilia nowala nagafeꞌ atini.

Revelation of John 9

Ensel nagafeꞌma wanif bifi nufapula biugel ananini

1 Eaꞌ ensel anamba nagafeꞌma wanif bifi nufapula biugel ananini, ati anona ondoꞌw nakwaha heven nowai itap. Ondoꞌw anamba anona ensel. Eaꞌ esis sasoꞌana ki utaini ma anona nowaga nagal nogowala itap awini. Nowaga anamba owaꞌ nefeꞌ nogotambilia nowala nagafeꞌ atini. ^a 2 Anen nawisiꞌ uta nowaga anamba eaꞌ nogoh luꞌwami matagai siꞌi nogoh magalo nif luꞌwamii. Eaꞌ nogoh amamba malo masoꞌala awin ilif, eaꞌ awin alipini naloma owambini mataga akutim. ^b 3 Eaꞌ anom asagof siꞌi kwamuꞌwis luꞌwami makwaha nogoh amamba mowala itap. Eaꞌ ensel anamba nasoꞌam banagami siꞌi banagami sipiawai wagape itapi wagahambombaga epesi. ^c 4 Eaꞌ mofaꞌ basef naꞌamba faꞌi,

“Ipaꞌ ina pehambombaga otalef aꞌa hiahaom mamimami magataga itapi, aꞌa anogah lawah, owaꞌi. Ipaꞌ pendahambombagago epes isimba atis ametal Godi owaꞌ logatoma amagah asasigahia.”

5 Eaꞌ amamba amom laꞌifima mogasoꞌasa akafimi epes isimba mefeꞌ mondahama aomb wanemb biamb, apaꞌ ina mofaꞌ banagami ma mohas sogagaꞌ, owaꞌ. Eaꞌ masoꞌasa akafimi awami endilisi ma epes isimba siꞌi sipiawa wagaha epes sagameꞌ akafimi luꞌwami. ^d 6 Nemaf afamba atiasi epes hiasi solaoma ufiaꞌwa siꞌi sogagaꞌ, apaꞌ owaꞌ, aꞌ owaꞌatin. Ina siti anoꞌw. Gaꞌ atiasi nondafaꞌmas someꞌ akafimi luꞌwami atapim mopais sope. ^e 7 Aeꞌ ati asagof amamba siꞌi hos dumbulidombola maꞌi mogapaꞌ. Balagahima mandati siꞌi hagw dembami atom mogowaloꞌagwi sandaꞌ gol sandaꞌagwi gwatoma balagah amamugahi. Apaꞌ amagah amamugahi siꞌi epesi nogohnaep sandandaꞌam. ^f 8 Balagah amamugahi auf laumi siꞌi balagah nematawai. Nalelef amamumi siꞌi nalelef mafis wandafisi laionim. ^g 9 Mafatagw amamumi mala siaogw siꞌi dunduwif agufum banagami eaꞌ faꞌisih amamumi malaꞌ mehip siꞌi hos magahondoꞌ wilkar luꞌwani hiani masagih magafeꞌma wandafa amalemb magalaꞌ. 10 Akwagah hailam siꞌi sipiawa eaꞌ nalelef fetawama mogaha hiasi molas nombota sogameꞌ akafimi. Amamba mape akwagahima. Akwagah amamumi banagami ma mogahambombaga epes aomb ambamba wanemb biamb. 11 Amom anona dembinai king amamunai numafiam. King anamba anen ensel nugumafi nowaga anamba nagal nogowala gani awin aꞌowaꞌi, nandafeꞌ atini. Diga esis Hibrui sagaꞌi agol ensel anambai saꞌi, Abadon. Diga esis Griki saꞌi, Apolion. Kofagefa faꞌi, “Aman nogahambombaga hiahaom hiamii.” ^h 12 Nemaf awafi ma nimanimi luꞌwami mugaliꞌii amom ahiꞌalam. Eaꞌ pemeꞌ! Nimanimi biafim ataꞌ magapanii bola motaga migiꞌi. ⁱ

Ensel anamba nagafeꞌma wanom wanomi nufapula biugel ananini

13 Eaꞌ ensel anamba nagafeꞌma wanom wanomi nufapula biugel ananini, ameꞌ anagol malogol gaꞌi gatagai belita sondolalima Goda sandaꞌ gol sandaꞌatai daꞌmalifitama doꞌwanidoꞌwan, togotawa naep Godii. ^j 14 Malogol agalemba gaꞌipa ensel anamba nugufapula biugeli naꞌamba gaꞌi, “Ensel amamba awami biamibiam mandaꞌ kalabusa walemb luꞌwambi Yufretis, inaꞌ nekwaha amom mofoꞌo.” ^k

15 Eaꞌ nakwahom mafeꞌma atiasi migiamba esis amam nematawa hiasi sagape itapi mowalogas sotaga miniꞌap wanifip eaꞌ moha miniꞌap atetep sogaꞌ, biafip sope beꞌes. God nandaꞌ ensel amamba dumbulidombol mape masasa nogota atamba ma nemaf awin inimba ma afagol agalemba atotogola mondaꞌ maol inimba. 16 Aeꞌ ameꞌ soldia hiami aꞌowaꞌ 200,000,000-pelaim matoma hos amamumi. Ameꞌ siambam mataga hiami aꞌowaꞌ. 17 Ape siꞌi koh dandaꞌaha agati amom magatoma hosi. Amom soldia mala siaogw kapaimi atom. Siaogw agwamba akwahimi alimi kolotuwaimi maloma batafumi. Balagah hosim siꞌi balagah mafis wandafumi luꞌwami laionim. Eaꞌ nif fandom nogoh mataga otamba batafumi salfa fandom mataga malogof amamugufi eaꞌ felegatam mafeꞌ. 18 Amom miamba esis amam nematawa hiasi mawalogas sataga miniꞌap wanifip eaꞌ maha atifip aꞌ afisa hiahaom amamba awami wanifim, nifi nogoh maloma otam salfa fagandumi magataga malogof hosi. Apaꞌ miniꞌap biafip sape beꞌes. 19 Banagami hosi mape malogofi andoh amamumi. Deiꞌ main, andoh amamumi siꞌi ugufi, balagah mandandaꞌam. Eaꞌ deiꞌ mahambombaga epesa andoh amamba amamumi. ^l

20 Anis epes hiasi ina afisa hiahaom amamba awami wanifim, ina sambema nelelemba sakwaha waf awafi, owaꞌatin. Esis ina sowaꞌ alafugaha hiahaom amamba sandaꞌam lagof asasigufi, owaꞌ. Ahoꞌ, esis ina deiꞌ sakwaha waf afamba sandaꞌ lotuma ambagof awami maloma god anamba basoꞌamunai sandaꞌ goli silva a bras otamba a lawah hiami maim sandaꞌami, hiahaom amamba ina magati o malutu magafiꞌi, magameꞌ basefi, owaꞌatin. 21 Epes isimba sagaha anis epes sagagaꞌi, sandaꞌ naohi ufiali eaꞌ sagaila waf soꞌa waulafii, sandaꞌ wal atini. Apaꞌ ina sambema nelelemba sowaꞌ alafugaha waf afamba, owaꞌatin.